جماعة بولنوار : 5 أعضاء يجرون الرئيس للقضاء بسبب ترخيص مشبوه والدرك الملكي بدا البحث

جماعة بولنوار على صفيح ساخن
خمسة ديال الأعضاء من المجلس الجماعي بولنوار وجهو شكاية رسمية للوكيل العام بمحكمة الإستئناف بالدار البيضاء، ضد رئيس الجماعة كيتهموه فيها بمنح ترخيص مشبوه فالملك العمومي بدون احترام المساطر القانونية.

الشكاية، اللي تقدمات نهار 11 شتنبر 2025، ووقّعوها 5 أعضاء كتوضح أن الرئيس منح ترخيص لأحد الأشخاص لاستغلال الملك العمومي (كشك تجاري) بقرار فردي بعد تنازل المستفيد الأصلي، بلا دفتر التحملات، بلا السمسرة العمومية، بلا تحديد الثمن من طرف لجنة التقييم، وحتى بلا مقرر جماعي بعد المداولات.

الأعضاء شددو باللي هاد الترخيص تعطا بدون علم مصلحة الممتلكات ، واعتابرو هاد الخطوة خرق واضح للقانون فيها شبهة استغلال النفوذ، وكتضرب فتكافؤ الفرص والمساواة، وكتحرم الجماعة من مداخيل مالية كانت تقدر تعاونها فالتنمية.

وبالفعل بأمر من الوكيل العام باستئنافية الدار البيضاء، حلّت اليوم عناصر من الشرطة القضائية للدرك الملكي بمقر الجماعة وشرعوا في البحث والاستماع للمعنيين بالأمر، في خطوة تؤكد جدية القضية وتوجهها نحو العدالة.

القضية دابا فيد القضاء، والساكنة كتسنى شنو غادي يسفر عليه التحقيق