أسفي: 100 مليون طارت من وكالة بريد بنك بطريقة أفلام البراكاج

اليوم الاثنين مع الصباح، سكان جمعة سحيم فإقليم آسفي فاقوا على خبر صادم : وكالة “بريد بنك” تعرضات لسرقة خطيرة مدبرة بحال سيناريو ديال شي فيلم أمريكاني.

المجهولين لي سطاو على الوكالة، خططو مزيان وحفرو منفذ في الحائط الخلفي ديال الوكالة ودخلو منه، باش يوصلو مباشرة للصندوق.. العملية كانت محكمة لدرجة أن الناس لي سمعوها قالو: “هادي بحال شي فيلم جريمة متقون”.

القيمة ديال الفلوس المسروقة حوالي 100 مليون سنتيم
هادشي دار حالة استنفار فالمنطقة، والدرك الملكي تحرك بسرعة ودار طوق أمني وبدا كيحقق فالنازلة.

التحريات باقي مستمرة:
كيقلّبو على أي أثر أو دليل وكيستمعو للشهود فالمنطقة.
وكيوجدو فرضيات باش يفكو اللغز ديال “كيفاش تم الحفر بلا ما يحس بيه حتى واحد”.

لحد الساعة، مازال ما بانتش هوية الفاعلين ولا الطريقة الكاملة كيفاش نفذو العملية، لكن المؤكد أن الجريمة كانت دقيقة ووراءها ناس عندهم تخطيط وجرأة كبيرة.

الجماعة كاملة اليوم كتعيش على وقع هاد الحادث، والناس كيسولوا:
“شكون قدر يدير هاد العملية الخطيرة ؟ وفين طارت 100 مليون؟”